ناڕەزایەتییە جەماوەریەکانی بەسرەهەنگاوێک بۆ پێشەوە/ئەڵتەرناتیڤی سۆشیالیستی

 

 

 

ناڕەزایەتییە جەماوەریەکانی بەسرەهەنگاوێک بۆ پێشەوە/ئەڵتەرناتیڤی سۆشیالیستی

حکومەت و پەرلەمانی عێراق کە نوێنەری حزبە دینی و قەومیە بۆرژوازییەکانە بە کورد و عەرەبەوە، لە ماوەی چەند ساڵی ڕابردوودا ئەوەی سەلماندووە کە نەک خەریکی دزین و بەتاڵانبردن و برسیکردن و بێبەریکردنی خەڵکی تەواوی عێراقە لە لانی کەمی ژیان، بەڵکوو هیچ سنورێکی نەهێشتووەتەوە لە دژایەتی کردنی کرێکاران و بێبەشکراوان و پارچەپارچەکردنی ڕیزەکانیان بە ناوی شیعە و سونە و کورد و عەرەب، و سوڕانەوە لە فەزای سیاسەتەکانی ئێران و تورکیا و ئەمریکا و تەواوی دەوڵەتە سەرمایەدارییەکانی ناوچەکە و جیهان. ئەم حکومەت و پەرلەمانەی بۆرژواکان، کاری سەرەکییان دابەشکردن و دژایەتی (دوژمنیاته‌تی)  خستنە نێوان جەماوەری فراوانی پرۆلیتاریا بووە و هەر بەم هۆیەشەوە توانیویانە تا ئێستا بەردەوام بن لە دەسەڵاتکردن و سەپاندنی دەسەڵاتیاندا. بەڵام دوای ئەوەی بۆرژواکان شکستیان هێنا لە سەپاندنی وەهمی دیموکراتی و پەرلەمانی و زەبر و زەنگ و کوشتار،   هەژموون و سەرکەوتنیان لەدەستدا و حه‌قیقه‌تی دیموکراسی بۆرژواکان دەرکەوت. بەڵێنە فریوکارانەکانیان دەرکەوتووه‌ و چیتر دەرفەتێک بۆ ژیان نەماوەتەوە، ئیتر بە تەواوی ناڕەزایەتییەکان  بە تایبەتی لە شاری بەسرەوه‌، گەشەیان سەند.

سەرەتای ناڕەزایەتییەکان بۆ دابینکردنی ئاوی خواردنەوە و کارەبا و دابینکردنی کار بوو . تەقەکردن و گرتن و ڕاوەدونان و کوشتوبڕی جەماوەری ناڕازیی کە هەمووی خەڵکی پرۆلیتاریا و بێبەشبوون و بەڵێنی چاکسازیکردن و دابینکردنی داخوازییەکانی خۆپیشاندەران و خەڵکی بەسرە، دوای پشتیوانیکردنی شارەکانی وەک کەربەلا و نەجەف و بەغدا و دەسکیسەکانی حزبە دینییە ڕکابەرەکان و بەکارهێنانی تەدەخولەکانیان لە خۆپیشاندانەکاندا و هەوڵدان بۆ بەلاڕێدابردنی، نزیکەی مانگێک له‌ چاوەڕوانی خەڵکی ناڕازی بەسرە هیچ ئاماژه‌یه‌كی ته‌نانه‌ت سه‌ره‌تاییش بە دابینکردنی داخوازییەکانیان بوونی نه‌بوو. مردنی هەمووڕۆژەی هەژار و نەداری بەسرە و بڵاوبوونەوەی پەتا و نەخۆشی و نەبوونی کەمترین پێداویستییە تەندرووستییەکان، پێكڕا بوونە هۆی جارێكیتر ڕژانه‌ سەرشەقامی خەڵکی وەدەنگهاتووی بەسرە، و بێ ئومێدبوونیشیان لە حکومەت بۆ دابینکردنی داخوازییەکانیان، و بەگژاچونەوەی هێزە چەکدارەکانی وەک حەشدی شەعبی، پەلاماری دێوەزمەی دەسەڵاتی بۆرژواکانیان داو وەهمی دیموکراسی لە بەسرە کەوتە بەر پەلاماردان و هەموو قونسڵخانەکانی پاراستنی کۆمپانیا نەوتییەکان کەوتنە بەر هێرشی جەماوەری وەدەنگ هاتوو و ناڕازی، دواتر هەڵکەندنی تەواوی دەسەڵات و سوتاندن و نەهێشتنی بارەگا و دامودەزگا سەرکوتگەرەکان، وسوتاندن و نەهێشتنی بارەگای تەواوی حزبە دینییە سەرکوتگەرەکان و قونسڵخانەکانی ئێران و ئەمریکای بەدوادا هات. هەژانی جەماوەری کرێکار و نەداری بەسرەی بێبەش لە سەرەتایترین پێداویستی ژیان و هۆکارەکانی ژیانکردن، بووە هۆی هاتنە دەنگی شارەکانی بەغدا و نەجەفی لانکی مەرجەعیەتی شیعەکان و سەرەتای خاڵێکی کاریگەر بۆ ئاڵوگۆڕ لە ئایندەی عێراقدا.

سەرەتای ئامادەباشی تەواوی جەماوەری پرۆلیتاریا لە باقی شارەکانی تری عێراق بۆ ڕاپەڕین و دەنگ هەڵبڕین و ژێرەوژورکردنی ئەم نیزامە چەوسێنەرە و دەستکردن بە  گۆڕینی ژیان، یەکێکە لە ئەرکە گرنگ و پایەییەکانی ڕەوتی سۆسیالیستی و کۆمۆنیستەکان و جوڵانەوە بە ئاراستەی جێگیرکردن و دابینکردنی هەنگاوەکانی ئەم جوڵانه‌وانه‌ بە ئاقاری  ئایندە و ژیانێکی تەواو جیاوازدا، کە ئەویش ژیان و کۆمەڵگایەکی سۆسیالیستییە. بەبێ خۆڕێکخستن لە شورا و ئەنجومەنە هەڵبژێردراوە جەماورییە شۆڕشگێڕانەکاندا یا هەر ئۆرگانێکی تری جەماوەری کە پشت ببەستێت بە ئیرادە و تواناكانی کرێکاران و بێبەشان و چینە چەوساوەکان،سەرکەوتنی تر مەحاڵە و بەبێ دەستگرتن بە سەر جومگە ئابوری و خزمەتگوزارییەکان و تەواوی ئەو بوارانەی کە ژیانکردنی پێوە بەستراوەتەوە و دروستكردنی ئۆرگانەکانی خۆبەڕێوەبردن و هەوڵدان و تێکۆشان بۆ فراوانکردن و قوڵکردنەوەی کەلێنی فەزای سیاسی عێراق، نەک پڕکردنەوەی ئەو بۆشاییە سیاسییەی کە هەیە و به‌ئاگایانە کارکردن بۆ تەکاندنی تەپوتۆز و ئایدیۆلۆژیای زاڵی ئەمڕۆ، پێنانە دەورەی داهاتوو مەحاڵە.بە مانایەکی تر:-

ناڕەزایەتیە جەماوەریەکانی ئەم دواییانەی بەسرە و پشتیوانی و هاوسۆزی جەماوەری پارێزگاکانی تری عێراق، نەک هەر کۆتایهێنان بوو بە قۆناغی تەوەهم بە پارت و هێزە سیاسییە دینی و قەومپەرستەکان و دەوڵەت و دامەزراوەکانی بە تەنها، بەڵکو قۆناغی بەربەرەکانێی ڕاستەوخۆی جەماوەری کرێکاران و بێکار و بێبەش لە لایەکەوە و دەوڵەت و دامەزراوەکانی و گشت پارتە سیاسییەکان لەلایەکی ترەوە بوو لەدژایەتییەکی قوڵتر و فراوانتر کە گەڕانەوەی نییە، و ڕێڕەوی گۆڕانکارییە سیاسییەکان و ئاڵوگۆڕەکانی داهاتووی ڕٶشنکردەوە کە  بەستراوەتەوە بە دەستپێکی قۆناغێک لە ڕوبەڕوبونەوە و ئامادەکاری و دابڕان لێیان…جەمسەری جەماوەری ناڕازی و خۆپیشاندەر یەکێک لە گرنگترین قۆناغەکانی بڕی لە ڕوبەڕوبونەوەیدا و ئیتر ئەرکیكی سەرەکییەتی پێ بنێتە قۆناغی دوای ئەو، کە ئەویش خۆی ئەبینێتەوە لە ڕێکخستن و ڕێکخراوکردنی ڕیزەکانی لە شورا و کۆمیتە شۆڕشگێڕەکانیدا لە گەڕەک و ناوەندەکان و دامەزراوە پێویستەکان نەک هەر بۆ بەڕێوەبردنی ئەم ململانێ و ڕوبەڕوبونەوانە بەڵکو بۆ بەڕێوەبردنی هەموو کۆمەڵگەش..کۆمۆنیستەکان و تێکۆشەران و خەباتکارانی چینی کرێکار ئەرکیانە دەسپێشخەربن بەم ئاراستەیەدا…پەلەکردن بۆ ڕێکخراوبوون و بەڕێوەبردنی کۆمەڵگە نەک هەر ڕێگە ئەگرێت لە هەوڵدان بۆ لەباربردن و قۆستنەوە و سواربوونی شەپۆلەکان لە لایەن ڕەوتە سیاسی و هێزە ناوچەییەکان بەتەنها، بەڵکو کۆمەڵگە و جەماوەر ئەخاتە بەردەرگای  ڕزگاری و ڕەهابوون.

بۆ پێشەوە بەرەو بەرپاکردنی کۆمیتەشۆڕشگێرانە و شوراکان و….

سەرکەوتوبێت خەباتی جەماوەریی پرۆلیتاریا و بێبەشان لە بەسرە و تەواوی عێراقدا

٧/٩/٢٠١٨

 

سەرنجێک بنووسە

ئیمەیڵەکەت بڵاوناکرێتەوە. تکایە سەرجەم خانەکان پڕ بکەرەوە *

*